საქართველოს საპარლამენტო დელეგაცია ჩინეთის სახალხო რესპუბლიკაში შეხვედრებს განაგრძობს

საგარეო ურთიერთობათა კომიტეტის თავმჯდომარე სოფიო ქაცარავა, საპარლამენტო დელეგაციის წევრებთან ერთად, ჩინეთის სახალხო რესპუბლიკის პოლიტიკური საკონსულტაციო საბჭოს ვიცე-სპიკერს მა პეიჰუას შეხვდა.

როგორც „ინტერპრესნიუსს“ პარლამენტიდან აცნობეს, შეხვედრაზე მა პეიჰუას საქართველოში ვიზიტის შედეგები განიხილებოდა, რომელიც სოფიო ქაცარავას საპასუხო ვიზიტით ჩინეთში გაგრძელდა.

მათივე ცნობით, მხარეებმა ორ ქვეყანას შორის არსებულ ურთიერთობებსა და თანამშრომლობის პერსპექტივებზე ისაუბრეს, რაც ძირითადად ეკონომიკური კავშირებითა და თავისუფალი ვაჭრობითაა განპირობებული.

მა პეიჰუამ ბიზნეს და საინვესტიციო გარემოს თვალსაზრისით, საქართველოს წინსვლაზე გაამახვილა ყურადღება და აღნიშნა, რომ ჩვენი ქვეყნით, დღითიდღე უფრო მეტი ჩინური კომპანია ინტერესდება.

სოფიო ქაცარავამ ხაზი გაუსვა საქართველოში ტურიზმის მნიშვნელობას და მისი განვითარების პოტენციალს.

„ჩინეთის სახალხო რესპუბლიკაში, საქართველოს მიმართ დიდი პოლიტიკური და ეკონომიკური ინტერესია, რაც ქვეყნის წინსვლასა და პროგრესზე მეტყველებს. ჩვენს კოლეგებს ვაცნობთ საქართველოში მიმდინარე პროცესებს და ვთანხმდებით თანამშრომლობის ახალი დღის წესრიგზე“, - აღნიშნა სოფიო ქაცარავამ.

ვიზიტის ფარგლებში ქართულმა დელეგაციამ შეხვედრა გამართა ასევე, ჩინეთის საგარეო ურთიერთობათა ინსტიტუტის ვიცეპრეზიდენტთან, სადაც საუბარი ძირითადად განათლების სფეროში თანამშრომლობის საკითხებს შეეხებოდა.

„საქართველოში ჩინური ენის მიმართ ინტერესი იზრდება და ეს ორი ქვეყნის კიდევ უფრო მეტად დაკავშირების ძალიან კარგი შესაძლებლობაა“, - აღნიშნა დელეგაციის ხელმძღვანელმა და ვიცე-პრეზიდენტს ამ მიმართულების განვითარების მხარდაჭერა შესთავაზა.

როგორც სოფიო ქაცარავამ აღნიშნა, ჩინეთის საგარეო ურთიერთობათა ინსტიტუტის ფარგლებში გამართულ კონფერენციებში უკვე ქართველი სტუდნეტებიც მიიღებენ მონაწილეობას, რაც სტაბილურობის, უსაფრთხოების, მშვიდობის დამყარების და სხვადასხვა საკითხებზე იმართება.