გიორგი კვირიკაშვილი - გადასახადების ლიბერალიზაცია იქნება ტრენდი მომავალში

გადასახადების ლიბერალიზაცია იქნება ტრენდი მომავალში, - ამის შესახებ პრემიერ-მინისტრობის კანდიდატმა გიორგი კვირიკაშვილმა პარლამენტის რიგგარეშე პლენარულ სხდომაზე განაცხადა, სადაც მთავრობისთვის ნდობის გამოცხადების საკითხს განიხილავენ.

თუმცა კვირიკაშვილმა კონკრეტული დეტალები არ დააკონკრეტა.

„ჩვენ საკმაოდ დაბალი გადასახადები გვაქვს - მსოფლიოში მეცხრე ადგილზე ვართ დაბალი გადასახადებით, ამიტომ ამ ეტაპზე მე ვფიქრობ, რომ შესაძლებელი იქნება, რომ ჩვენ 2% დამატებითი კონტრიბუცია დავაწესოთ საპენსიო შენატანის სახით. ეს არ არის გადასახადი, ეს არის საპენსიო ფონდში თანადაფინანსების კონტრიბუცია. თუმცა გადასახადების ლიბერალიზაცია იქნება ტრენდი მომავალში. მე დღეს კონკრეტიკას ვერ ვიტყვი, მაგრამ ჩვენ არ გვაქვს ის განწყობა, რომ საგადასახადო ტვირთი გავზარდოთ, პირიქით, გვინდა, რომ რაც შეიძლება ლიბერალური იყოს ჩვენი საკანონმდებლო ჩარჩო“, - განაცხადა გიორგი კვირიკაშვილმა.