ხელი არ დაადოთ - ბიჭებს, უთხარით, არ დაადოს ხელი არავინ, - ასე მიმართა გუშინ, პარლამენტის სხდომაზე პრემიერ-მინისტრმა გიორგი კვირიკაშვილმა დეპუტატ ნიკა მელიასთან დაპირისპირებულ პირებს.
”იგივეს აკეთებს, თავი დაანებეთ”, - განაცხადა გიორგი კვირიკაშვილმა, როცა ნიკა მელია პარლამენტის სხდომათა დარბაზიდან გაჰყავდათ.
პარლამენტის სხდომათა დარბაზში ხმაური მელიას სიტყვით გამოსვლის შემდეგ დაიწყო. კერძოდ, მელიამ პარლამენტის ტრიბუნიდან მთავრობის ლოჟისკენ გადაინაცვლა და მინისტრებს ახლო მანძილიდან მიმართავდა. პროცესი დეპუტატებისა და მინისტრების მონაწილეობით სიტყვიერ შელაპარაკებაში გადაიზარდა.
ვითარების განმუხტვისთვის მანდატურის სამსახურის ჩარევა გახდა საჭირო.