საქართველოს ადვოკატთა ასოციაციის თავმჯდომარეობის კანდიდატი ლევან ჯანაშია 23 დეკემბრის არჩევნების მეორე ტურში მონაწილეობას არ მიიღებს.

ლევან ჯანაშიას მიაჩნია, რომ 9 დეკემბერს გამართული არჩევნები გაყალბდა და მეორე ტურის გამართვა მაშინ, როდესაც პირველი არალეგიტიმურია, სრულიად წარმოუდგენელი და მიუღებელია.

როგორც ლევან ჯანაშია აცხადებს, მეორე ტურის გამართვის გადაწყვეტილება მიიღო ასოციაციის აღმასრულებელმა საბჭომ, რაც ასევე კანონდარღვევაა, ვინაიდან მისი დანიშვნის უფლება მხოლოდ ასოციაციის თავმჯდომარეს აქვს.

ლევან ჯანაშიამ 9 დეკემბრის არჩევნების გაბათილების მოთხოვნით სასამართლოს სარჩელით მიმართა. სასამართლო პროცესი 2018 წლის 6 მარტს, 14:00 საათზე გაიმართება.

„ასოციაციის მოქმედი თავმჯდომარე აცხადებს, რომ ჩვენი სარჩელით ვითხოვთ ყველა ორგანოს ფუნქციონირების შეჩერებას, რაც არის ადვოკატთა ასოციაციის გაჩერების მცდელობა. ამ განცხადებით ზაზა ხატიაშვილს, რბილად რომ ვთქვათ, თავად შეჰყავს საზოგადოება შეცდომაში, რადგან ახალი თავმჯდომარის არჩევამდე თანამდებობაზე რჩება მოქმედი თავმჯდომარე და ჩვეული რეჟიმით განაგრძობს მუშაობას, მით უმეტეს, რომ ასოციაციის „ორგანოების“ ფუნქციონირების შეჩერება ჩვენგან არავის მოუთხოვია. ასევე გაუგებარია (განსაკუთრებით ადვოკატთა ასოციაციის თავმჯდომარისგან), რატომ არის სიბინძურე მიმართო სასამართლოს და სამართლებრივად გადავწყვიტო აღნიშნული დავა. გარკვეული შეკითხვები მეც მაქვს ზაზა ხატიაშვილთან და ამას ღიად ვაცხადებდი ყველგან, მაგრამ, როგორც ჩანს, მას არაფერი აქვს სათქმელი ამიტომაც გაურბის ჩვენთან შეხვედრას“, - განაცხადა ლევან ჯანაშიამ.