მთავრობის ადმინისტრაციასთან „თეთრი ხმაურის“ მოძრაობა აქცია-პერფორმანსს მართავს და აღმასრულებელ ხელისუფლებასთან შეხვედრას ითხოვს.

როგორც „თეთრი ხმაურის“ მოძრაობის წარმომადგენელმა ბექა წიქარიშვილმა განაცხადა, ქვეყანაში 12 წელია ტარდება ყველაზე მკაცრი ნარკოპოლიტიკა, რომელმაც ქვეყანა უარეს შედეგებამდე მიიყვანა.

„მე-12 დღეა, რაც ხუთი პატიმარი შიმშილობს ციხეებში. ისინი ითხოვენ კანონპროექტის დაჩქარებულ რეჟიმში განხილვას და ყურადღებას არავინ აქცევს. 12 წელია ქვეყანა ატარებს ყველაზე მკაცრ ნარკოპოლიტიკას, რომელმაც პირიქით, უარესი შედეგები მოუტანა ქვეყანას და მომხმარებელთა რაოდენობა იზრდება. ეს არის ნარკოპოლიტიკის ლიბერალიზაციისთვის უმთავრესი არგუმენტი. გუშინ მოვისმინეთ პრემიერ-მინისტრის და შს მინისტრის განცხადებები, რომ აკლიათ არგუმენტები. „თეთრი ხმაური“ მზად არის დისკუსიისთვის და ვითხოვთ შეხვედრას აღმასრულებელ ხელისუფლებასთან. ჩვენ მზად ვართ, წარვსდგეთ როგორც დარგის ექსპერტებთან, ასევე სათემო ორგანიზაციებთან ერთად და ჩვენი მოთხოვნაა, რაც შეიძლება მალე გაიმართოს დისკუსია. ყველა არგუმენტს წარვადგენთ, რომელიც რეფორმისთვისაა სასარგებლო“, - განაცხადა წიქარიშვილმა.

„თეთრი ხმაურის“ მოძრაობის წევრები ამ წუთებში აქცია-პერფორმანსს მართავენ, სადაც მათ გაშალეს თეთრი ნაჭერი წარწერით „ჩვენ ვითვლით წამებს!“.