ჩაწყობილ თამაშებზე დაკავებული ვაჟა კვარაცხელია ბრალს არ აღიარებს და პროვოკაციაზე მიუთითებს

საკალათბურთო კლუბ სოხუმის მწვრთნელის, ვაჟა კვარაცხელიას ადვოკატის, თამარ აბესაძის განცხადებით, მისი დაცვის ქვეშ მყოფი ბრალს არ აღიარებს და პროვოკაციაზე მიუთითებს, - ამის შესახებ ადვოკატმა ჟურნალისტებს განუცხადა. ის სუს-ის შენობაში ჯერჯერობით არ შესულა.

ადვოკატის განმარტებით, ის დღეს ესაუბრა დაკავებულ ვაჟა კვარაცხელიას, რომელმაც უთხრა, რომ მას ბრალდება კომერციულ მოსყიდვას ედავება. როგორც ცნობილია კომერციული მოსყიდვის ბრალდებით დაკავებულია ასევე საკალათბურთო კლუბ ”სოხუმის” თანამფლობელი თემურ დათიკაშვილი, რომლის ინტერესებსაც თამარ აბესაძე იცავს. ადვოკატის განმარტებით, მისი დაცვის ქვეშ მყოფებისთვის ბრალი ოფიციალურად არ წარუდგენიათ და შესაძლოა ბრალის წარდგენა ხვალ მოხდეს. ადვოკატის თქმით, კომერციული მოსყიდვის თაობაზე ბრალს არც კვარაცხელია და არც დათიკაშვილი არ აღიარებენ.

ამასთან, როგორც ადვოკატმა ჟურნალისტებს განუცხადა, ცოტა ხნის წინ მან მიიღო გარკვეული სახის ინფორმაცია, რომელიც უნდა შეათანხმოს მისი დაცვის ქვეშ მყოფებთან, თუმცა, რა სახის ინფორმაციაზეა საუბარი, ადვოკატი თამარ აბესაძე არ აკონკრეტებს. ”ვიცავ თემურ დათიკიშვილის ინტერესებს, ასევე, ვაჟა კვარაცხელიას ინტერესებს. ჩემი დაცვის ქვეშ მყოფი ორივე პირისთვის ჯერ ბრალი არ არის წაყენებული. როგორც გამომძიებელმა მაცნობა, ხვალ იქნება ბრალის წარდგენა. სავარაუდოდ, პროექტი არის ასეთი, რომ სსკ-ის 221-ე მუხლის მე-4 ნაწილით აპირებენ ბრალის წაყენებას, თუმცა, როგორც ჩემი დაცის ქვეშ მყოფებთან გავარკვიე, ეს არის დანაშაულის პროვოცირება, შესაბამისად, დაცვის მხარეს ამის თაობაზე ჩვენი სამოქმედო გეგმა გვაქვს. დაკავებულები ბრალს არ აღიარებენ. თუმცა, როგორც გავიგე სხვა ბრალდებულები ბრალს აღიარებენ. როგორც ჩემთვის გახდა ცნობილი, მათ ჩვენება არ აქვთ მიცემული და საიდან გამოვიდა ასეთი ინფორმაცია არ ვიცით. ჩემი დაცვის ქვეშ მყოფი ორივე პირი მკაფიოდ ლაპარაკობს იმას, რომ ყოველივე არის დანაშაულის პროვოკაცია. პროვოცირებულია აღნიშნული ქმედებები, რაც არის სახელმწიფო უსაფრთხოების სამსახურის მხრიდან გავრცელებული. კვარაცხელიაც პროვოკაციაზე მიუთითებს. საგამოძიებო მოქმედებები, რაც ტარდებოდა მათ მიმართ, უამრავი ზარია განხორციელებული, რომელსაც ალბათ ბრალდების მხარე მოიპოვებს, მაგრამ დაცვის მხარესაც არ გვძინავს და ამას წარმოვადგენთ სასამართლოზე”, - განაცხადა ადვოკატმა.

შეგახსენებთ, რომ კომერციული მოსყიდვის ბრალდებით დაკავებულები არიან მსაჯები ირაკლი და დავით ბერიშვილები. მათი ადვოკატის, იოსებ ბესელიას განცხადებით, ბერიშვილები ბრალს აღიარებენ.

რამაზ საყვარელიძე - ქართულ პოლიტიკაში უშინაარსობა უნდა დამთავრდეს, თორემ ერთფეროვნებაში, როცა არც პურია და არც სანახაობა, კიდევ უფრო გაიზრდება პოლიტიკური ნიჰილიზმი
ქართული პრესის მიმოხილვა 21.09.2019
„სოფლად ცხოვრება, როგორც ტურისტული პროდუქტი” - რა იგეგმება ბათუმში 20-21 სექტემბერს?
გერმანიის ფრეზენიუსის ინსტიტუტის ლაბორატორიის  დასკვნით მარნეულის სასურსათო ქარხნის წარმოების ტრადიციულ წითელ ტყემალში სუდანის ჯგუფის საღებავები არ აღმოჩნდა (R)
„ვისოლმა“ თვითმომსახურების პირველი ავტოგასამართი სადგური გახსნა