რუსეთი აშშ-ის მიერ უკრაინისათვის შეიარაღების მიწოდებას სახიფათოდ მიიჩნევს. ამის შესახებ რუსეთის საგარეო საქმეთა მინისტრის მოადგილემ გრიგორი კარასინმა განაცხადა.

მისი თქმით, აღნიშნულით ვაშინგტონი კიევში საომრად განწყობილ ძალებს აქეზებს.

„აშშ-ის მიერ მიღებულ გადაწყვეტილებას, კიევისთვის შეიარაღების მიწოდების თაობაზე მოსკოვში საკმაოდ სახიფათოდ მიიჩნევენ. საქმე არა ამერიკული შეიარაღების პარამეტრებში და რაოდენობაშია, არამედ ვაშინგტონის მიერ კიევში საომრად განწყობილი ძალების დე ფაქტო წაქეზებაშია. ამით მათ ძალისმიერი სცენარის განხორციელებისკენ უბიძგებენ“, - განაცხადა გრიგორი კარასინმა.

აშშ-ის სახელმწიფო დეპარტამენტის ოფიციალური წარმომადგენელის ჰიზერ ნაუერტის განცხადებით, აშშ-მა მიიღო გადაწყვეტილება, უკრაინას თავდაცვისუნარიანობის გაზრდის ძალისხმევის ფარგლებში, თავდაცვითი საშუალებები გადასცეს.