ქუთაისში ოთხი საბავშვო ბაღის გაფართოება მიმდინარეობს. როგორც „ინტერპრესნიუსს“ რეგიონული განვითარებისა და ინფრასტრუქტურის სამინისტროდან აცნობეს,ქვეყნის მასშტაბით საბავშვო ბაღების მშენებლობა-რეაბილიტაცია გრძელდება. ამ დროისთვის, ქუთაისში ოთხი საბავშვო ბაღის გაფართოების მიზნით, აქტიური სამუშაოები მიმდინარეობს.

„პროექტი ითვალისწინებს მიშენებების მშენებლობას, ასევე შიდა სარემონტო სამუშაოებს და ეზოების კეთილმოწყობას. ოთხივე სააღმზრდელო დაწესებულებაში დამატებითი ჯგუფები გაიხსნება“, - ნათქვამია ინფორმაციაში.

სამუშაოები რეგიონული განვითარებისა და ინფრასტრუქტურის მინისტრის მოადგილემ კახა გულედანმა, მხარის გუბერნატორ გივი ჭიჭინაძესთან ერთად დაათვალიერა.

„სამუშაოების აუცილებლობა ბავშვთა ნაკადის ზრდამ და მოთხოვნამ განაპირობა. სამუშაო რეგიონებში განსახორციელებელი პროექტების ფონდიდან ფინანსდება და მისი ჯამური ბიუჯეტი 1 მილიონ ლარამდეა“, - ნათქვამია ინფორმაციაში.