საფეხბურთო კლუბმა ,,რუსთავმა“ უმაღლეს ლიგაში გადასვლა საზეიმო მსვლელობით აღნიშნა

საფეხბურთო კლუბმა ,,რუსთავმა“ ეროვნული ლიგა 2-ის 2017 წლის სეზონის ჩემპიონობა და უმაღლეს ლიგაში გადასვლა საზეიმო მსვლელობით აღნიშნა.

საზეიმო მსვლელობა რუსთავის ,,ფოლადის’’ სტადიონიდან დაიწყო და სამ ლოკაციაზე - კოსტავას გამზირზე, შადრევნის მიმდებარედ, მეგობრობის გამზირზე მდებარე ცენტრალური ფოსტის შენობასთან და შარტავას გამზირზე, ჟიული შარტავას ძეგლის მიმდებარე ტერიტორიაზე მოეწყო.

აქციის მიმდინარეობისას, საფეხბურთო კლუბ ,,რუსთავის’’ ხელმძღვანელობამ, მწვრთნელებმა და ფეხბურთელებმა ქალაქის ხელმძღვანელობასთან ერთად, გულშემატკივრებს აქტიური მხარდაჭერისთვის მადლობა გადაუხადეს და დამდეგი შობა-ახალი წელი მიულოცეს, პატარა ქომაგებს კი, საჩუქრად ფეხბურთის ბურთები დაურიგეს.

სამწლიანი პაუზის შემდეგ, საქართველოს ეროვნული საფეხბურთო ჩემპიონატის უმაღლეს დივიზიონში თამაშის უფლება, ,,რუსთავმა’’ ვადამდე, ეროვნული ლიგა 2-ის ბოლოსწინა ტურში, თბილისის ,,ვიტ ჯორჯიას’’ დამარცხებით მოიპოვა.

საფეხბურთო ჩემპიონატის ეროვნული ლიგის შეხვედრები 2018 წლის გაზაფხულზე დაიწყება.