ესპანეთის მეფემ, ფელიპე მეექვსემ ტრადიციულ საშობაო გზავნილში კატალონიის ახლად არჩეულ პარლამენტს მოუწოდა, უარი თქვან ესპანეთისგან გამოყოფისკენ მიმართულ ნაბიჯებზე.

სატელევიზიო გამოსვლაში ესპანეთის მეფემ აღნიშნა, რომ არ უნდა ჰქონდეს ადგილი კონფრონტაციას, რომელიც მხოლოდ განხეთქილებას და გაურკვევლობას წარმოშობს.

„2017 წელი ესპანეთში რთული იყო ჩვენი საერთო კეთილდღობისთვის, პირველ რიგში კატალონიაში შექმნილი სიტუაციის გამო.

მიუხედავად იმისა, რომ ესპანეთი ევროკავშირის სრულად ინტეგრირებული წევრი გახდა, ბოლო ათწლეულში ყველაფერი წარმატებული არ იყო. კატალონიის საზოგადოების შუაგულში საჭიროა ჰარმონიული თანაცხოვრების აღდგენა, რათა იდეებმა ოჯახები და მეგობრები არ გაყონ“, - დასძინა მეფემ.