ჭიათურისა და საჩხერის მიტროპოლიტი - ღვთის წინააღმდგომ ძალას ერთსულოვნება შეშურდა და ჩვენს ხალხში სცადა არეულობა შემოეტანა

ერთსულოვნება შეშურდა ღვთის წინააღმდგომ ძალას და ჩვენს ხალხში სცადა არეულობა შემოეტანა, - ამის შესახებ ჭიათურისა და საჩხერის მიტროპოლიტმა დანიელმა სვეტიცხოველში პატრიარქის აღსაყდრებიდან 40 წლის სადღესასწაულო წირვის დასრულების შემდეგ განაცხადა, რომელმაც წმინდა სინოდის სახელით მრევლს მიმართა და პატრიარქის ღვაწლზე ისაუბრა.

მეუფე დანიელის თქმით, ჩვენი იდენტობის უმთავრესი საფუძველი ქრისტიანობაა და მასთან ერის დაბრუნება არის შედეგი უმძიმესი 40 წლის მანძილზე პატრიარქის თავგანწირული ღვაწლის. მეუფე დანიელმა წლის დასაწყისში პატრიარქის გერმანიაში ყოფნის პერიოდი გაიხსენა, სადაც მას ოპერაცია ჩაუტარდა.

„მისი უწმინდესობისადმი მადლიერების საერთო სახალხო გამოხატულება იყო წლის დასაწყისში გერმანიაში სამკურნალოდ მყოფი პატრიარქისთვის აღვლენილი ერის საყოველთაო ლოცვა. ამ ლოცვამ სასწაული მოახდინა. ურთულესი და ფრიად სახიფათო ოპერაცია საუკეთესო შედეგით დამთავრდა. სწორედ ერთსულოვნება შეშურდა ღვთის წინააღმდგომ ძალას და ჩვენს ხალხში სცადა არეულობა შემოეტანა. მაგრამ საბოლოოდ კიდევ უფრო მეტი სიმტკიცე შესძინა ჩვენს ერთობას“, - განაცხადა მეუფე დანიელმა.