ჟურნალისტი ქსენია სობჩაკი, რომელიც პარტია „სამოქალაქო ინიციატივამ“ 2018 წლის რუსეთის საპრეზიდენტო არჩევნებზე კანდიდატად წარადგინა, ოპოზიციონერ ალექსეი ნავალნის სთავაზობს მისი ნდობით აღჭურვილი პირი გახდეს. ამის შესახებ მან ერთ-ერთ სოციალურ ქსელში დაწერა.

სობჩაკის განცხადებით, ნავალნის არჩევნებზე არდაშვება „წარმოუდგენელი უსამართლობა და ხელისუფლების მორიგი შეცდომაა“. მისი თქმით, ეს კიდევ ერთხელ მიუთითებს იმაზე, რომ „ჩვენ მაინც უნდა ვიმოქმედოთ, არ გავჩერდეთ და მივიდეთ არჩევნებზე“. სობჩაკის აზრით, ნავალნის მიერ არჩევნების ბოიკოტირება არაეფექტური მეთოდია, რომელიც არჩევნებზე აქტიურობის მაჩვენებელს სერიოზულად ვერ შეამცირებს და მხოლოდ ვლადიმერ პუტინის უპირატესობას გაზრდის.

გუშინ რუსეთის ცენტრალურმა საარჩევნო კომისიამ სობჩაკი საპრეზიდენტო კანდიდატად დაარეგისტრირა. გუშინვე ცესკო-მ ალექსეი ნავალნის მძიმე მუხლით მისჯილი მოუხდელი დანაშაულის გამო კანდიდატად დარეგისტრირებაზე უარი განუცხადა, რის შემდეგაც ნავალნიმ საკუთარ მომხრეებს არჩევნების ბოიკოტირებისკენ მოუწოდა.