საუდის არაბეთის ხელისუფლებამ კორუფციასთან ბრძოლის ფარგლებში დაკავებული მაღალჩინოსნების და სამეფო ოჯახის წევრების ნაწილი გაათავისუფლა

საუდის არაბეთის ხელისუფლებამ, ბოლო კვირის განმავლობაში, კორუფციასთან ბრძოლის ფარგლებში დაკავებული სულ მცირე 20 მაღალჩინოსანი გაათავისუფლა, რომელთა შორის სამეფო ოჯახის წევრებიც არიან. ამის შესახებ გამოცემა The Wall Street Journal წერს.

გამოცემის ინფორმაციით, გათავისუფლებულთა შორის არიან ფინანსთა ყოფილი მინისტრი, სახელმწიფო ნავთობკომპანია Saudi-ს ერთ-ერთი ხელმძღვანელი იბრაჰიმ აბდელ აზიზ ალ-ასაფი, პრინცი თურქი ბენ ხალიდი და ფინანსთა მინისტრის ყოფილი თანაშემწე, კომპანია Saudi Telecom-ის ყოფილი ხელმძღვანელი.

The Wall Street Journal-ის ინფორმაციით, ეჭვმიტანილთა გათავისუფლება მიუთითებს იმაზე, რომ მათ ხელისუფლებასთან შეთანხმებას მიაღწიეს და გათავისუფლების სანაცვლოდ გარკვეული თანხა გადაიხადეს.

მანამდე გავრცელებული ინფორმაციით, ერთ-ერთი დაკავებულის, პრინცის ალ-ვალიდ ბენ ტალიალის გათავისუფლების სანაცვლოდ ხელისუფლება 6 მილიარდი დოლარის გადახდას ითხოვდა.