აუდიტის სამსახურის წარმომადგენელი ცოტნე ქარქაშაძე ვიზიტით ინდონეზიაში იმყოფებოდა

სახელმწიფო აუდიტის სამსახურის წარმომადგენელმა ცოტნე ქარქაშაძემ ინდონეზიის დედაქალაქ ჯაკარტაში, მონაწილეობა მიიღო აზია ოკეანეთის ქვეყნების ლიდერების რეგიონულ ფორუმში „ღია მმართველობა ინკლუზიური განვითარებისათვის“.

როგორც „ინტერპრესნიუსს“ სახელმწიფო აუდიტის სამსახურიდან აცნობეს, ფორუმის მიზანს წარმოადგენდა მხარეებს შორის ღია მმართველობის გამოცდილებისა და საუკეთესო პრაქტიკის მაგალითების გაზიარება ინკლუზიურ განვითარებაში. „ღია მმართველობის პარტნიორობისა“ (OGP) და ინდონეზიის მთავრობის მიერ ორგანიზებულ ფორუმზე სახელმწიფო აუდიტის „სახელმწიფო ბიუჯეტის ანალიზის“ სამსახურის ხელმძღვანელმა ცოტნე ქარქაშაძემ წარადგინა ანალიტიკური ვებ-პლატფორმა „ბიუჯეტის მონიტორი“, როგორც საჯარო ფინანსების მართვის პროცესში მოქალაქეთა ჩართულობის საუკეთესო პრაქტიკის მაგალითი.

ფორუმს სხვადასხვა ქვეყნების ცენტრალური და მუნიციპალური ხელისუფლების ლიდერები, მინისტრები, სამოქალაქო და არასამთავრობო სექტორის წარმომადგენლები, ბიზნეს-სექტორი, მედია და სხვა დაინტერესებული მხარეები ესწრებოდნენ.