პანკისის ხეობაში სპეცოპერაციის დროს დაჭრილი თემირლან მაჩალიკაშვილის ჯანმრთელობის მდგომარეობა ამ დრომდე მძიმეა.

როგორც "ინტერპრესნიუს" თელავის რეფერალური საავადმყოფოს ექიმმა განუცხადა, დაჭრილი ღრმა კომატოზური მდგომარეობით, რეანიმაციულ განყოფილებაში, მართვით სუნთქვაზე იმყოფება.

მაჩალიკაშვილს გუშინ ნეიროქირურგიული ოპერაცია ჩაუტარდა. მას ქალა ტვინის გამჭოლი ჭრილობა აქვს.

ექიმებს ჯანმრთელობის მდგომარეობასთან დაკავშირებით პროგნოზის გაკეთება უჭირთ.

შეგახსენებთ, რომ პანკისსა და თბილისში მორიგი სპეცოპერაციები გუშინ ჩატარდა. დაკავებულია 5 პირი, მათ შორის 1 დაიჭრა. სუს-ის ინფორმაციით, პოლიცია იძულებული გახდა პროპორციული ძალა გამოეყენებინა, ვინაიდან თემირლან მაჩალიკაშვილმა წინააღმდეგობის გაწევა და ხელყუმბარის მოქმედებაში მოყვანა სცადა.