მერიის ყოფილი თანამშრომლის, ოთარ აბესაძის ჯანმრთელობის მდგომარეობა ამ დროისთვის სტაბილურია. როგორც „ინტერპრესნიუსს“ კარდიოლოგიური დეპარტამენტის ხელმძღვანელის მოადგილე ნონა მაისურაძემ განუცხადა, დაგეგმილია დამატებითი კვლევების ჩატარება, რის გამოც დღის მეორე ნახევარში კონსილიუმის მოწვევა იგეგმება.
ნონა მაისურაძის ინფორმაციით, ოთარ აბესაძე კონტაქტურია და ამჟამად ჩივილები არ აღენიშნება.
"ოთარ აბესაძე გუშინ მოთავსდა კლინიკაში გონების კარგვის ეპიზოდის გამო, ასევე მას გულ-მკერდის არეში ტკივილი აღენიშნებოდა. ამჟამად, პაციენტის მდგომარეობა დამაკმაყოფილებელია. გამოირიცხა მიოკარდიუმის მწვავე დაზიანება, უბრალოდ, დაგეგმილია დამატებითი კვლევები. ასევე, კონსილიუმი იგეგმება. შემდგომი განცხადებები ამ კვლევების დასრულებისთანავე გაკეთდება. გადაწყდება პაციენტის ბინაზე გაწერის საკითხი", - განაცხადა მაისურაძემ.
ოთარ აბესაძე სასჯელაღსრულების დაწესებულებიდან ჩაფიძის კლინიკაში გუშინ გადაიყვანეს. ექიმის განცხადებით, არსებობს ეჭვი, რომ მას გულის შეტევა ჰქონდა, თუმცა საბოლოო პასუხი დღეს გახდება ცნობილი.