გავრცელებულ აუდიოჩანაწერებზე მიხეილ სააკაშვილის ხმის ავთენტურობის დასადგენად ჩატარებული ექსპერტიზის შედეგები ერთ თვეში გახდება ცნობილი

უკრაინის გენერალური პროკურორის, იური ლუცენკოს განცხადებით, გენპროკურატურის მიერ გამოქვეყნებულ აუდიოჩანაწერებზე მიხეილ სააკაშვილის ხმის ავთენტურობის დადგენის მიზნით ჩატარებული ექსპერტიზის შედეგები ერთი თვის განმავლობაში გახდება ცნობილი.

„ვფიქრობ, დაახლოებით ერთი თვის განმავლობაში მივიღებთ პირველ შედეგებს ფონოსკოპიურ ექსპერტიზასთან დაკავშირებით“, - განაცხადა იური ლუცენკომ.

უკრაინის გენერალურმა პროკურორმა ასევე აღნიშნა, რომ ექსპერტიზა შესაძლოა გაიწელოს, ვინაიდან აუდიოჩანაწერებში სხვა პირების საუბარიცაა დაფიქსირებული.

აქამდე იური ლუცენკომ განაცხადა, რომ კიევში სააკაშვილის მიერ ორგანიზებული აქციები ყოფილი პრეზიდენტის, ვიქტორ იანუკოვიჩის გარემოცვის მიერ იყო დაფინანსებული. უკრაინის გენერალურმა პროკურატურამ ასევე გამოაქვეყნა აუდიოჩანაწერები, რომელშიც დაფიქსირებულია მიხეილ სააკაშვილი და მოსკოვში გაქცეული ბიზნესმენი კურჩენკო.