უკრაინის სასამართლომ მიხეილ სააკაშვილის მიერ შსს-ს წინააღმდეგ შეტანილი სარჩელის განხილვა 26 თებერვლამდე გადადო

კიევის საოლქო ადმინისტრაციულმა სასამართლომ საქართველოს ყოფილი პრეზიდენტის, მიხეილ სააკაშვილის მიერ უკრაინის შსს-ს წინააღმდეგ შეტანილი სარჩელის განხილვა 26 თებერვლამდე გადადო. ამის შესახებ „ტასს“ სააკაშვილის ადვოკატმა პაველ ბოგომაზოვმა განუცხადა.

„სხდომა გადაიდო 26 თებერვლის 15:10 საათამდე, ვინაიდან შსს უკვე რამდენიმე კვირაა ვერ ახერხებს მათი ბრძანების გასაჩივრების შესახებ განცხადების გამოქვეყნებას“, - განაცხადა მან.

ადვოკატის თქმით, საუბარია შსს მიერ 2012 წელს გამოცემული ბრძანების გაუქმებასა და უკანონოდ ცნობაზე. ამ ბრძანების მიხედვით, „მოქალაქეობის ჩამორთმევისთვის საკმარისი მიზეზები გაიზარდა“.

„მოქალაქეობის ჩამორთმევისთვის საკმარისი მიზეზების რიცხვი კანონქვემდებარე აქტის მიხედვით იზრდება, რაც უკანონოა, ვინაიდან ეს ამომწურავი ჩამონათვალი უკრაინის შესაბამისი კანონით და არა კანონქვემდებარე აქტით უნდა იყოს განსაზღვრული“, - აღნიშნა ბოგომაზოვმა.