წარმოდგენა არ მაქვს რატომ დააკავეს ჩემი შვილი, ბუნებრივია, რომ ბრალს არ აღიარებს, - ამის შესახებ პანკისში სპეცოპერაციის დროს დაკავებული რუსლან ალდამოვის დედამ, დალი ალდამოვამ ჟურნალისტებთან საუბრისას საქალაქო სასამართლოში განაცხადა.
დალი ალდამოვამ კიდე ერთხელ გაიხსენა მისი შვილის დაკავების დეტალები.
”საერთოდ აზრზე არ ვარ რატომ დააკავეს. ჩემი შვილი ოჯახში საქმიანობდა, რემონტს აკეთებდა. თუ რატომ დააკავეს არც მან იცის და ბუნებრივია, ბრალს არ აღიარებს. დაკავების დროს შემოცვივდნენ, კარი შემოამტვრიეს და ბავშვი ისე წაიყვანეს”, - განაცხადა დალი ალდამოვამ.
შეგახსენებთ, რომ 26 დეკემბერს სუს-მა 5 პირი დააკავა, აქედან 4 პანკისში, ერთი კი - თბილისში. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირი და მათი დახმარება ედება ბრალად. პანკისში ჩატარებული სპეცოპერაციის დროს ერთი პირი დაიჭრა.