თამარ ჩუგოშვილი რატიანის საქმეზე - სასამართლომ სამართალდარღვევასთან დაკავშირებით უნდა მიიღოს გადაწყვეტილება, პროკურატურა კი გამოიძიებს სამართალდამცავთა მხრიდან თუ იყო დარღვევა

პარლამენტის თავმჯდომარის პირველი მოადგილის თამარ ჩუგოშვილის განცხადებით, პოეტ ზვიად რატიანის საქმესთან დაკავშირებით, გამოძიება მიმდინარეობს. მისი თქმით, სამართალდარღვევასთან დაკავშირებით გადაწყვეტილება სასამართლომ უნდა მიიღოს, მეორეს მხრივ, პროკურატურა დაადგენს იყო თუ არა გადაცდომა სამართალდამცველთა მხრიდან.

„ამ საქმესთან დაკავშირებით, მე რამდენადაც ვიცი, საქართველოს პროკურატურაც იძიებს, იყო თუ არა სამართალდამცავების მხრიდან რაიმე გადაცდომა, შესაბამისი პასუხისმგებლობაც დადგება, თუმცა ზოგადად, სამართალდაღვევასთან მიმართებით, მიუხედავად იმისა, ვინ არის სამართალდამრღვევი, შესაბამისი სამართლებრივი შედეგები დგება. სხვადასხვა სახის მტკიცებულებებია, მათ შორის ეს ვიდეო ჩანაწერი არის სასამართლოზე წარდგენილი. შესაბამისად, ერთი მხრივ სასამართლომ სამართალდარღვევასთან დაკავშირებით უნდა მიიღოს გადაწყვეტილება, ხოლო პროკურატურა გამოიძიებს თუ კი სამართალდამცავთა მხრიდან იყო რაიმე დარღვევა”, - განაცხადა ჩუგოშვილმა.