წყლის ტარიფის ზრდა ძირითადად გამოიწვია იმ კაპიტალურმა დანახარჯებმა, რომელიც კომპანიებმა გასწიეს, განსაკუთარებით ეს იყო ქსელის რეაბილიტაციის თვალსაზრისით, - ამის შესახებ სემეკის წევრმა გოჩა შონიამ კომისიის სხდომის დასრულების შემდეგ განაცხადა, რომელზეც 2018-2020 წლების წყლის სამომხმარებლო ტარიფები დაამტკიცეს.

როგორ გოჩა შონიამ აღნიშნა, სამივე კომპანიასთან ("ჯორჯიან უოთერ ენდ ფაუერი", "მცხეთის წყალი" და "რუსთავის წყალი") მიმართებაში დაფიქსირდა ზრდა, ხოლო ზოგიერთ ნაწილში მცირედით კლება.

"ძირითადად მაინც ტარიფის ზრდა გამოიწვია იმ კაპიტალურმა დანახარჯებმა, რომელიც კომპანიებმა გასწიეს. განსაკუთარებით ეს იყო ქსელის რეაბილიტაციის თვალსაზრისით. მოგეხსენებათ, რომ ძალიან მოცულობითი ხარჯები გასწია "ჯორჯიან უოთერ ენდ ფაუერმა" 2017 წელს ამ თვალსაზრისით, ეს იყო დაახლოებით 55 მილიონ ლარამდე. ასევე, სამივე კომპანია 2018-2020 წელს დაახლოებით, 220 მილიონი ლარის ინვესტიცის განხორციელებას გეგმავს. ძირითადი ხარჯი მოდის სწორედ ქსელის რეაბილიტაციაზე, რადგანაც ამ ქსელს სჭირდება ძალიან დიდი ინვესტიცია, ძალიან დიდი კაპიტალდაბანდება, რადგანაც ქსელი არის მოძველებული და შესაბამისად, იმისთვის, რომ მომხმარებელს ჰქონდეს საიმედო და ამავე დროს მაღალი ხარისხის მომსახურება, ამისთვის საჭიროა მნიშვნელოვანი თანხების ჩადება ამ ქსელის რებილიტაციაში", - განაცხადა გოჩა შონიამ.