ზუგდიდის საკრებულომ ქალაქის 2018 წლის მთავარი ფინანსური დოკუმენტი დაამტკიცა. გადაწყვეტილებას მხარი ოპოზიციური პარტიის წარმომადგენლებმა არ დაუჭირეს.

მათი თქმით, შენიშვნების ნაწილის გათვალისწინების მიუხედავად, მთავარ საკითხზე შეთანხმება მაინც ვერ მოხერხდა. თავის მხრივ, საკრებულოს თავმჯდომარე მამუკა წოწერია ამბობს, რომ შენიშვნებისა და რეკომენდაციების უმეტესი ნაწილი, რომლითაც საკრებულომ მერიას ბიუჯეტის პროექტი გადაუგზავნა, გათვალისწინებულია.

სხდომას ქალაქის მერი ლაშა გოგიაც ესწრებოდა, რომელმაც დეპუტატების კითხვებს უპასუხა და დასძინა, რომ ბიუჯეტი რაციონალურად არის გათვლილი. სხდომაზე ასევე იმყოფებოდა "საერთაშორისო გამჭვირვალობა - საქართველოს" ადგილობრივი ოფისის ხელმძღვანელი არჩილ თოდუაც. მისი შეფასებით, ეს არ არის პროგრამული ბიუჯეტი და იმედი აქვს, რომ მომავალი წლისთვის მაინც დაამტკიცებენ ისეთ დოკუმენტს, რომელიც დაგეგმვის პროცესიდანვე იქნება შედეგებზე ორიენტირებული. მომავალი წლის ბიუჯეტი 36.500.000 ლარის ოდენობით განისაზღვრა.