მოსამართლემ სრულად გაიზიარა ჩვენს მიერ წარდგენილი შუამდგომლობა, რომელიც ოთხივე ბრალდებული პირისთვის აღმკვეთი ღონისძიების სახით პატიმრობის შეფარდებას შეეხებოდა, - ამის შესახებ სასამართლო პროცესის დასრულების შემდეგ საქმის პროკურორმა ელიზბარ გოზალიშვილმა ჟურნალისტებთან საუბრისას განაცხადა.

გოზალიშვილის თქმით, მოსამართლემ გაითვალისწინა ბრალდების მტკიცებულება, რომლის მიხედვითაც არსებობდა ბრალდებული პირების მიმალვის, ასევე, გამოძიებისთვის ხელის შეშლის საფრთხეები. პროკურორმა გორნაკაშვილის საქმის ცალკე სასამართლო სხდომაზე განხილვის თაობაზეც ისაუბრა და განმარტა, რომ გორნაკაშვილის საქმე დანაშაულებრივი ჯგუფის წევრობისთვის კავშირში ბრალდებული პირების საქმიდან არ გამოცალკევებულა.

”დღეს მოხდა 4 ბრალდებულის პირველი წარდგენა სხდომაზე. ბრალდება მოითხოვდა მათთვის პატიმრობის შეფარდებას, რაც მოსამართლემ დააკმაყოფილა. მოსამართლემ გაიზიარა ის გარემოება, რომ არსებობდა საფრთხე ბრალდებულების მხრიდან მოწმეებზე მომხდარიყო ზეგავლენა. ასევე, დანაშაულის ქმედების გაგრძელება და საქართველოს ტერიტორიის დატოვების საფრთხე. რაც შეეხება გორნაკაშვილის საქმეს, ეს იყო ჩვეულებრივი სტანდარტული პროცედურა, როდესაც მათ ბრალი წარედგინათ. ჩვენ მივმართეთ სასამართლოს აღმკვეთი ღონისძიების შეფარდებაზე შუამდგომლობით. ამის შემდეგ მივმართეთ სხვა ბრალდებულებზეც. სწორედ ამის გამო გაიმართა ცალცალკე სასამართლო პროცესები”, - განაცხადა პროკურორმა ელიზბარ გოზალიშვილმა.