თავის არეში დაჭრილი თემირლან მაჩალიკაშვილის ოჯახი უცხოეთიდან ექიმის მოწვევას ან მის სხვა ქვეყანაში სამკურნალოდ გადაყვანას აპირებს.

როგორც დაჭრილის მამამ, მალხაზ მაჩალიკაშვილმა ჟურნალისტებს განუცხადა, დღეს ვითარება ძალიან კრიტიკულია და მდგომარეობა უფრო და უფრო მძიმდება.

მისივე თქმით, ქართველი ექიმები აღარ აიმედებენ, რის გამოც უცხოელი ექიმების მოწვევის ან სხვა ქვეყანაში გამგზავრების გადაწყვეტილება მიიღო.

“მკურნალ ექიმს ვესაუბრე. ვითარება დღეს არის ძალიან კრიტიკული. კარგისკენ არ არის არაფერი, ცუდისკენ მიდის ყველაფერი. ქართველი მედიკოსები მეუბნებიან, რომ სადაც არ უნდა წავიყვანოთ, არა გვგონია, რამე ეშველოსო. მაინც გულში რაღაც რომ არ დამრჩეს, ვაპირებ, მოვიწვიო რუსეთიდანაც და სხვადასხვა ქვეყნებიდანაც ექიმები. ასევე მეორე ვერსია არის სხვაგან გადაყვანა. ღმერთის ხელშია ყველაფერი”, - განაცხადა მალხაზ მაჩალიკაშვილმა.

თემირლან მაჩალიკაშვილი წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს რეანიმაციულ განყოფილებაში მართვით სუნთქვაზე იმყოფება. ის პანკისში სპეცოპეაციის დროს თავის არეში დაჭრეს.