პროკურორი - დამოუკიდებელი ექსპერტიზით არ დადგინდა, რომ ოთარ აბესაძის მდგომარეობა მძიმეა და პატიმრობა გირაოთი უნდა შეეცვალოს

თბილისის მერიის ყოფილი მაღალჩინოსნის, ოთარ აბესაძის საქმის პროკურორი ირაკლი მარშანია აცხადებს, რომ ოთარ აბესაძის ჯანმრთელობისმდგომარეობა არ არის საგანგაშო და სასამართლომ მიიჩნია, რომ იგი თავსებადია სასჯელაღსრულების დაწესებულებაში ყოფნასთან.

როგორც „ინტერპრესნიუსს“ მარშანიამ განუცხადა, ინფორმაცია, თითქოს აბესაძე არის მძიმედ ავად, მიუხედავად მცდელობებისა, დაცვის მხარემ სასამართლოზე ვერ დაადასტურა, რადგან აღნიშნული ფაქტი ექსპერტიზის დასკვნით არ დადგინდა.

„პროკურატურა დაეთანხმა დაცვის მხარის შუამდგომლობას, რომ ჩაეტარებინა ექსპერტიზა, რათა დადგენილიყო აბესაძის ჯანმრთელობის მდგომარეობა. დაცვის მხარის განმარტება, რომ ბრალდებულის ჯანმრთელობის მდგომარეობა მძიმეა და მას აღკვეთის ღონისძიება - პატიმრობა გირაოთი უნდა შეეცვალოს, არის სიცრუე და არ შეესაბამება სინამდვილეს, ვინაიდან ასეთი რამ წარმოდგენილი დასკვნით არ დგინდება.

დაცვის მხარეს, ნაცვლად იმისა, რომ უფლებამოვალეობებს ჯეროვნად ახორციელებდეს, სტრატეგია მთლიანად აგებული აქვს პიარზე. იგი ცდილობს საზოგადოება შეცდომაში შეიყვანოს და ამ გზით მოახდინოს პროკურატურისა და სასამართლოს დისკრედიტაცია“, - აღნიშნა პროკურორმა.

ირაკლი მარშანიას თქმით, იმ შემთხვევაში, თუ დადგინდება, რომ ბრალდებულის ჯანმრთელობის მდგომარეობა შეუთავსებელია პენიტენციურ დაწესებულებაში ყოფნასთან, პროკურატურა თვითონვე იღებს აღკვეთის ღოისძიების შეცვლის გადაწყვეტილებას.

„აღსანიშნავია ის ფაქტი, რომ ბრალდების მხარე, აბესაძის ინტერესებიდან გამომდინარე, დაეთანხმა დაცვის მხარის შუამდგომლობას, პროცესების ნაწილის დახურვის შესახებ, რომ არ გამჟღავნებულიყო ოთარ აბესაძის პერსონალური ინფორმაცია. ახლა კი ამ ფაქტს დაცვის მხარე იყენებს სათავისოდ და მედიასთნ ურთიერთობისას აჟღერებს ისეთ გარემოებებს, რაც სხდომაზე საერთოდ არ მომხდარა. ოთარ აბესაძის უფლებადამცველს აქვს სრული უფლება, გაასაჯაროოს აღნიშნული დასკვნა, რათა საზოგადოებამ სრული სიმართლე გაიგოს და შეწყდეს ამ თემით სპეკულირება. პროკურატურა ყოველთვის გამოთქვამს მზადყოფნას, ბრალდებულის მძიმე მდგომარეობის შემთხვევაში მოახდინოს სათანადო რეაგირება და არ მოხდეს საპატიმროსთან შეუთავსებელი ჯანმრთელობის მდგომარეობის მქონე პირის პატიმრობაში დატოვება. მესმის, რომ სასჯელაღსრულების დაწესებულებაში ყოფნა იწვევს დისკომფორტს და სტრესს, მაგრამ ამ ეტაპზე აბესაძის მიმართ გამოყენებილი პატიმრობის შეცვლის სამართლებრივი საფუძველი არ არსებობს“, - განაცხადა პროკურორმა ირაკლი მარშანიამ.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს