შს მინისტრთან და მის მოადგილეებთან გამართულ შეხვედრაზე ვისაუბრეთ პოლიციაში ძალის გადამეტების პრობლემაზე, - ამის შესახებ ჟურნალისტებს შინაგან საქმეთა სამინისტროში, მინისტრთან და მის მოადგილეებთან გამართული შეხვედრის დასრულების შემდეგ არასამთავრობო ორგანიზაცია "ადამიანის უფლებების სწავლებისა და მონიტორინგის ცენტრის" (EMC) წარმომადგენელმა სოფიო ვერძეულმა განუცხადა.

მისი ინფორმაციით, არასამთავრობო სექტორთან შეხვედრა მინისტრ გიორგი გახარიას ინიციატივით შედგა, სადაც საუბარი შეეხო იმ დაგეგმილ რეფორმებს, რომელზეც შსს მუშაობს.

„ვისაუბრეთ ბევრ საკითხზე, მათ შორის დაგეგმილ რეფორმებზე. ამ ნაწილში რამდენიმე პოზიტიური საკითხი აღინიშნა, მათ შორის კრიმინალური პოლიციის რეფორმა და ასევე უბნის ინსპექტირების საკითხი. ჩვენი მხრიდან დაისვა საკითხები, მათ შორის დამოუკიდებელი საგამოძიებო მიექანიზმის შექმნის თაობაზე, გენერალური ინსპექტირების რეფორმირება, ძალის გადამეტების პრობლემა პოლიციაში. ასევე, ვისაუბრეთ სტატისტიკასთან დაკავშირებულ საკითხზე. ჩვენი მხრიდან გაჟღერდა ის, რომ კარგი იქნექბა თუ ამ ინიციატივის განხილვა სამუშაო ჯგუფის ფორმატში მოხდება და ამ საკითხის განსახილველად სამუშაო ჯგუფი შექმნება“, - განაცხადა სოფიო ვერძეულმა.