ადვოკატთა ასოციაციის თავმჯდომარის დავით ასათიანის განცხადებით, ადვოკატთა ასოციაციის ფუნქციონირებას საფრთხე არ ემუქრება და 8 იანვრიდან შეუფერხებლად გააგრძელებს ყველა სერვისის მიწოდებას.

როგორც დავით ასათიანი აცხადებს, ადვოკატთა ასოციაციის ოფისში გაჩენილი ხანძარი ლიკვიდირებულია და გამომწვევ მიზეზებს გამოძიება სწავლობს, ჩართულია კრიმინალისტები და სახანძრო ექსპერტები.

მისივე ინფორმაციით, ყველა ძირითადი დოკუმენტაცია გადარჩენილია, განადგურდა სასამართლო საქმეების არქივი და ზოგიერთი მიმდინარე კორესპონდენცია. ასევე სრულადაა გადარჩენილი ეთიკის კომისიის დოკუმენტები და ფინანსური დოკუმენტაცია.

„ადვოკატთა ასოციაციის ფუნქციონირებას საფრთხე არ ემუქრება და 8 იანვრიდან შეუფერხებლად გავაგრძელებთ ყველა სერვისის მიწოდებას“, - განაცხადა დავით ასათიანმა.

შეგახსენებთ, რომ თბილისში, ზუბალაშვილების ქუჩაზე გაჩენილი ხანძრის შედეგად ადვოკატთა ასოციაციის ოფისის სხვენში არსებული 4 ოთახი დაიწვა. ცეცხლი გვიან ღამით გაჩნდა.

როგორც შინაგან საქმეთა სამინისტროს სსიპ საგანგებო სიტუაციების მართვის სააგენტოში აცხადებენ, ხანძარი ორსართულიანი ძველი შენობის მანსარდაში იყო. ადგილზე მუშაობდა 6 სახანძრო-სამაშველო ჯგუფი. ხანძრის შედეგად არავინ დაშავებულა.