ძლიერი ჭექა-ქუხილის გამო, სოფიას აეროპორტში დაშვებული ავიაკომპანია Wizz Air-ის თვითმფრინავის მგზავრები ავტობუსს ელოდებიან.
როგორც ერთ-ერთი მგზავრი აცხადებს, ისინი უკვე რამდენიმე საათია ბულგარეთში, სოფიას აეროპორტში იმყოფებიან.
„ყველა სადღაც რეკავს - ქუთაისის აეროპორტში, „ვიზეარის“ წარმომადგენლებთან, ყველას სხვადასხვა პასუხი აქვს. გვეუბნებიან, რომ მოვა ავტობუსი და ჩაგვიყვანს სალონიკში. მგზავრები ვცდილობთ, რომ დავუკავშირდეთ საგარეო საქმეთა სამინისტროს, აქაურ კონსულს, მაგრამ ვერ ხერხდება“, - განუცხადა ერთ-ერთმა მგზავრმა „რუსთავი 2“-ს.
შეგახსენებთ, რომ ძლიერი ჭექა-ქუხილის გამო, ავიაკომპანია Wizz Air რეისი W66401 ქუთაისი-კავალა, სოფიას საერთაშორისო აეროპორტში გადამისამართდა.როგორც ქუთაისის საერთაშორისო აეროპორტში აცხადებენ, მგზავრების ტრანსპორტირებას სოფიადან კავალას მიმართულებით ავიაკომპანია უზრუნველყოფს.