გურიაში ავარიას ორი ადამიანის სიცოცხლე ემსხვერპლა, ორი კი მძიმე მდგომარეობაში საავადმყოფოში ამ დრომდე რჩება. არსებული ინფორმაციით, მერია-ლაითურის მაგისტრალზე მოძრავი BMW-ს მარკის ავტომანქანა გზის სავალი ნაწილიდან გადავიდა და ხეს შეეჯახა, რის შემდეგაც ხევში გადავარდა. ავტომანქანაში ოთხი ადამიანი იმყოფებოდა, რომელთაგან ორი საავადმყოფოში მიყვანის შემდეგ გარდაიცვალა, ორი დაშავებული კი ამ დრომდე საავადმყოფოში რჩება. მათი მდგომარეობა მძიმეა.

როგორც “ინტერპრესნიუსს“ შსს-ში განუცხადეს, მომხდარზე გამოძიება სისხლის სამართლის კოდექსის 276-ე მუხლის მე-7 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა გამოიწვია.