შემოქმედებითი მოძრაობა „ტალღის“ ორგანიზებით, 31 დეკემბერს, ღამის 12 საათზე, სასჯელაღსრულების ერთ-ერთ დაწესებულებასთან სოლიდარობის კონცერტი გაიმართება.
როგორც კონცერტის ორგანიზატორები აცხადებენ, სოლიდარობის კონცერტი არ ატარებს საპროტესტო ხასიათს და ეს არის სოლიდარობის აქცია ადამიანებისადმი, რომლებიც ”სადამსჯელო ნარკოპოლიტიკის გამო საახალწლო დღესასწაულს ოჯახისა და საყვარელი ადამიანების გარემოცვაში ვერ შეხვდებიან”.
მათივე განცხადებით, განგებ არ მჟღავნდება სოლიდარობის კონცერტის ზუსტი მდებარეობა.
„ტალღა“ განგებ არ ამჟღავნებს სოლიდარობის კონცერტის ზუსტ მდებარეობას, რათა უხვ მხარდამჭერთა მოზიდვით ღონისძიებამ პოლიტიკური იმპლიკაციები არ შეიძინოს. აქცია არ არღვევს სისხლის სამართლის ან ადმინისტრაციულ კანონს“, - განაცხადა შემოქმედებითი მოძრაობა „ტალღის“ წარმომადგენელმა შოთა დიღმელაშვილმა.
მისივე ინფორმაციით, პატიმრების გარდა, სოლიდარობის მესიჯის ადრესატი საკანონმდებლო ორგანოა, რათა მათ გაიაზრონ იმ ოჯახების მდგომარეობა, რომელთაც საკუთარ თავზე გამოსცადეს რეპრესიული ნარკოპოლიტიკა და უმოკლეს ვადებში განიხილონ ჰუმანური ნარკოპოლიტიკის კანონპროექტი.