აშშ-ს პრეზიდენტი დონალდ ტრამპი აცხადებს, რომ ამერიკა ირანში მიმდინარე პროტესტებზე დაკვირვებას განაგრძობს.
„როგორც იქნა, ირანელმა ხალხმა სასტიკი და კორუმპირებული რეჟიმის წინააღმდეგ მოქმედება დაიწყო. ფული, რომელიც ობამამ ასე სულელურად გადასცა მათ, ტერორიზმის მხარდაჭერაზე დაიხარჯა და მათ „ჯიბეებში“ მოხვდა. ხალხს საკვები აკლია, ინფლაცია დიდია, ირღვევა ადამიანის უფლებები. ამერიკა დაკვირვებას განაგრძობს!“, - დაწერა ტრამპმა „ტვიტერის“ საკუთარ მიკრობლოგში.
თეირანში, მეშჰედში, ისპაანსა და ირანის სხვა დიდ ქალაქებში მასობრივი აქციები 28 დეკემბრიდან მიმდინარეობს. ქვეყნის პრეზიდენტის, ჰასან როუჰანის თქმით, აქციები შიდა პრობლემებით და გარეშე წაქეზებით არის გამოწვეული. ირანული მედიის ინფორმაციით, შეტაკებების შედეგად 20 ადამიანია დაღუპული.