პროკურორი მიხეილ სააკაშვილის ადვოკატის დისციპლინური პასუხისმგებლობის საკითხის დაყენებას აპირებს

პროკურორი ირაკლი ნადარეიშვილი საქართველოს ყოფილი პრეზიდენტის, მიხეილ სააკაშვილის სახაზინო ადვოკატის, სოფიო გოგლიჩიძის დისციპლინური პასუხისმგებლობის საკითხის დაყენებას აპირებს, თუკი ის „მომდევნო პროცესის გადადებას კვლავ არარეალური მიზეზით მოითხოვს“.

როგორც ნადარეიშვილმა ჟურნალისტებს 25 დეკემბრის სხდომის დასრულების შემდეგ განუცხადა, „პროცესის გადადების მიზეზი, ისევე, როგორც წინა პროცესის შემთხვევაში, უარგუმენტო იყო, რაც მათ სასამართლოში წარდგენილი დოკუმენტებით დაადასტურეს“.

"როგორც წინა, ასევე ამ პროცესზე დავადასტურეთ, რომ ადვოკატმა იცრუა, რომ საქმის მასალების გაცნობა გადატვირთული გრაფიკის გამო ვერ შეძლო. ჩვენ გამოვითხოვეთ დოკუმენტები და დადასტურდა, რომ დაცვის მხარემ ამ 12 დღის მანძილზე, რა ვადაც მიეცა დასკვნითი სიტყვის მოსამზადებლად, იმუშავა სულ სამი საათი. სხვა საგამოძიებო მოქმედებაში ან სასამართლო პროცესში მას მონაწილეობა არ მიუღია. შესაბამისად, არგუმენტი, რომ ვერ ასწრებს ამ საქმის გაცნობას, სხვა საქმეებში მონაწილეობის გამო, არის სიცრუე", - აღნიშნა პროკურორმა.

ამასთან, ნადარეიშვილის თქმით, პროცესების გადადების მოთხოვნა, სასამართლო განხილვების გაჭიანურებას ემსახურება.

"თუ ადვოკატი 3 იანვარს ჩანიშნულ სხდომაზე ისევ სხვა არარეალურ მიზეზს მოიგონებს და ანალოგიურ შუამდგომლობას დააყენებს, მე პირადა მივმართავ საქართველოს ადვოკატთა ასოციაციის ეთიკის კომისიას, აღნიშნული ადვოკატის საკითხზე მსჯელობის მიზნით, რათა დაადგინონ დისციპლინური პასუხისმგებლობა", - განაცხადა ირაკლი ნადარეიშვილმა.

როგორც ცნობილია, სააკაშვილის სახაზინო წესით დანიშნული ადვოკატის მოთხოვნის საფუძველზე, სანდრო გირგვლიანის საქმესთან დაკავშირებული პროცესი 25 დეკემბერსაც გადაიდო. ამის მიზეზად ადვოკატმა ის გარემოება დაასახელა, რომ საქმის მასალების გაცნობა ვერ შეძლო.

ალექსეი მალაშენკო - სირიაში ყველაფერი ისევ ისე იქნება, როგორც აქამდე იყო,  ბაშარ ასადის შესანარჩუნებლად მოსკოვს ანკარასთან და თეირანთან კომპრომისებზე წასვლა უწევს
ქართული პრესის მიმოხილვა 19.09.2019
„სოფლად ცხოვრება, როგორც ტურისტული პროდუქტი” - რა იგეგმება ბათუმში 20-21 სექტემბერს?
საქართველოს საგარეო პოლიტიკა - ნაბიჯები მომავლისკენ
BDO-მ მე-4 კატეგორიის კომპანიების მომსახურებისთვის სპეციალური გუნდი გამოყო
რა მავნე ნივთიერებები აღმოაჩინა ჰამბურგის ლაბორატორიამ საქართველოდან გაგზავნილი თუთუნის შემადგენლობაში