აშშ-ის პრეზიდენტის მრჩევლის ეროვნული უშიშროების საკითხებში, გენერალ-ლეიტენანტ ჰერბერტ მაკმასტერის განცხადებით, რუსეთი ამერიკის საპრეზიდენტო არჩევნებში ერეოდა და ეს დონალდ ტრამპისთვის ცნობილია. ამის შესახებ მაკმასტერმა „ამერიკის ხმის“ რუსულ რედაქციასთან ინტერვიუში განაცხადა.
„რუსეთი იყენებს დეზინფორმაციას, პროპაგანდას და სოციალურ ქსელებს, რათა წარმოშვას განხეთქილება ჩვენს საზოგადოებაში და სოციალური ჯგუფები ერთმანეთს დაუპირისპიროს. რუსეთი აქტიურობდა ევროპაშიც - საფრანგეთში გამართულ არჩევნებზე, კატალონიის რეფერენდუმზე. ჩვენ დავაფიქსირეთ მათი აქტიურობა მექსიკაში, ისინი მონტენეგროში პუტჩის ორგანიზებასაც ცდილობდნენ. დესტაბილიზაციის გამომწვევი რუსული კამპანიის სააშკარაოზე გამოტანა არის პირველი მნიშვნელოვანი ნაბიჯი“, - განაცხადა აშშ-ს პრეზიდენტის მრჩეველმა.
მისი თქმით, რუსეთი მსგავს საქმიანობასთან საკუთარ კავშირს დღემდე არ აღიარებს, მაგრამ მას ეს სულ უფრო არადამაჯერებლად გამოსდის.
„იგივე ადამიანები ამბობენ, რომ თვითმფრინავი არ ჩამოუგდიათ და ხალხი არ მოუკლავთ, რომ მათი ჯარისკაცები ყირიმსა და უკრაინაში არ დგანან, რომ არ უჭერენ მხარს სირიულ რეჟიმს, რომელმაც საკუთარი მოქალაქეების წინააღმდეგ ქიმიური იარაღი გამოიყენეა. დღეს ამის აღარავის სჯერა“, - აღნიშნა მაკმასტერმა.