უკრაინის საგარეო საქმეთა სამინისტროს განცხადებით, გერმანიის საგარეო საქმეთა მინისტრის ზიგმარ გაბრიელის ვიზიტისას საუბრის მთავარი საკითხი იქნება გერმანიის, საფრანგეთისა და ნორმანდიის ფორმატის როლი რუსული აგრესიის საპასუხოდ. „ამასთან დაკავშირებით, მინისტრი განიხილავს სამომავლო ერთობლივ ნაბიჯებს უკრაინის ტერიტორიული მთლიანობისა და სუვერენიტეტის აღსადგენად, ასევე რუსების მიერ დატყვევებული უკრაინელების განთავისუფლების საკითხს“, - ნათქვამია უკრაინის საგარეო საქმეთა სამინისტროს ზიგმარ გაბრიელის ვიზიტთან დაკავშირებით გავრცელებულ განცხადებაში.
ზიგმარ გაბრიელი უკრაინაში დღეს უნდა ჩავიდეს, სადაც თავის კოლეგასთან, პავლო კლიმკინთან ერთად მინსკის ხელშეკრულების პირობების დანერგვაზე უნდა ისაუბროს.
შეხვედრის შემდეგ გაბრიელი და კლიმკინი უკრაინის აღმოსავლეთ ტერიტორიებს ეწვევიან, სადაც სადემარკაციო ხაზს დაათვალიერებენ.