გაერო-ში აშშ-ის მუდმივმა წარმომადგენლობამ მიღება მოაწყო, სადაც იმ ქვეყნებს გადაუხადა მადლობა, რომლებმაც იერუსალიმის სტატუსთან დაკავშირებით გაერო-ს გენერალურ ასამბლეაზე ანტიამერიკულ რეზოლუციას მხარი არ დაუჭირეს. მიღებაზე ასევე მიწვეულნი იყვნენ გაერო-ში იმ ქვეყნების წარმომადგენლები, რომლებიც აღმნიშნულ კენჭისყრას არ დაესწრნენ.
მიღებაზე დამსწრე საზოგადოებას ვიდემიმართვაში მადლობა გადაუხადა აშშ-ის პრეზიდენტმა დონალდ ტრამპმა.
„მინდა ყველა იმ ქვეყანას გადავუხადო მადლობა, ვინც აშშ-ს მხარი დაუჭირა იერუსალიმის სტატუსზე გაერო-ს გენერალურ ასამბლეაზე კენჭისყრისას. დარწმუნებული იყავით, რომ 21 დეკემბერს თქვენს მიერ გადადგმული ნაბიჯი ისტორიაში, როგორც მნიშვნელოვანი თარიღი შევა და თქვენი ქმედება დიდად დაფასებულია ჩვენს მიერ“, - განაცხადა დონალდ ტრამპმა ვიდეომიმართვაში.
თავის მხრივ, აღნიშნულ მიღებას სოციალურ ქსელში გაერო-ში აშშ-ის ელჩი ნიკი ჰეილი გამოეხმაურა.
„მეგობრებისთვის იოლია თქვენთან ყოფნა ლხინში, მაგრამ ის მეგობრები, რომლებიც თქვენს გვერდით გამოწვევების დროს არიან, არასოდეს იქნებიან დავიწყებულნი. მადლობა თქვენ“, - დაწერა ნიკი ჰეილიმ.
21 დეკემბერს, გაერო-ს გენერალურმა ასამბლეამ საგანგებო სხდომაზე 128 ხმით მიიღო რეზოლუცია, რომელიც აშშ-ს მოუწოდებს, უკან წაიღოს გადაწყვეტილება იერუსალიმის ისრაელის დედაქალაქად აღიარებისა და საელჩოს იერუსალიმში გადატანის თაობაზე.
აღნიშნულ რეზოლუციას მხარი არ დაუჭირა 9 ქვეყანამ: გვატემალამ, ისრაელმა, მარშალის კუნძულებმა, პალაუმ, ტოგომ, მიკრონეზიამ, ნაურუმ, ჰონდურასმა და აშშ-მ. 35 ქვეყანამ კი თავი შეიკავა კენჭისყრისას.
საქართველოს გაეროს გენერალური ასამბლეის საგანგებო სხდომაში მონაწილეობა არ მიუღია. ქართული დელეგაცია არ იმყოფებოდა დარბაზში, როცა კენჭი ეყარა ისრაელის დედაქალაქად იერუსალიმის აღიარების გადაწყვეტილების საწინააღმდეგო რეზოლუციას.