კალათბურში გარიგებული მატჩების საქმეზე ბრალდებული მსაჯის, ზაზა მაჩალაძის ადვოკატის განცხადებით, ფარულ ჩანაწერებში ბრალდებულები გარკვეულ პირებზე საუბრობენ, თუმცა ეს საუბრები ბუნდოვანია.
როგორც „ინტერპრესნიუსს“ მაჩალაძის ადვოკატმა შოთა მანელიძემ განუცხადა, ე.წ. გარიგებულ მატჩებში, ბრალდებულების გარდა სხვა ვინმე კონკრეტული პიროვნება არ ფიგურირებს.
„თეორიულ დონეზე ვიღაც-ვიღაცების სახელები გაჟღერებულია, მაგრამ ეს არის მხოლოდ ვიღაცის მიერ ვიღაცის ხსენების ფორმატი. საქმეში კონკრეტული პიროვნება, გარდა ბრალდებულებისა, არავინ ფიგურირებს. ეს საუბრები ძალიან ბუნდოვანია“, - განაცხადა მანელიძემ.
რაც შეეხება მაჩალაძის მდგომარეობას, ადვოკატის ინფორმაციით, ბრალდებულის ფსიქოლოგიური მდგომარეობა ამჟამად გაუმჯობესებულია.
„ფსიქოლოგიური მდგომარეობა ახლა შედარებით უკეთესია. იმედი აქვს, რომ რაღაც უკეთესობა იქნება“, - აღნიშნა ადვოკატმა.
არსებული ინფორმაციით, ე.წ. გარიგებული მატჩების საქმეში კიდევ ერთი პირი ფიგურირებს, რომელიც სავარაუდოდ, კალათბურთის ფედერაციის მაღალჩინოსანია.
როგორც „ინტერპრესნიუსისთვის“ ხდება ცნობილი, საქმის მასალების მიხედვით, მატჩების კონკრეტული შედეგით დასრულების სანაცვლოდ მიღებულ თანხას ბრალდებულები კიდევ ერთ ადამიანთან ინაწილებდნენ. კერძოდ, საუბარია კალათბურთის ფედერაციის ერთ-ერთ მაღალჩინოსანზე.
როგორც სააგენტოს ინფორმირებულმა წყარომ განუცხადა, აღნიშნული პირის შესახებ ბრალდებულები ფარულ აუდიო-ვიდეო ჩანაწერებში საუბრობენ, თუმცა ჩვენებებში მის ვინაობას არ ასახელებენ.
გარიგებული მატჩების საქმეზე კალათბურთის მსაჯები და საკალათბურთო კლუბ "სოხუმის" მწვრთნელები სახელმწიფო უსაფრთხოების სამსახურმა რამდენიმე კვირის წინ დააკავა. საერთო ჯამში, ჯგუფურად კომერციული მოსყიდვის ფაქტზე აყვანილია 5 პირი. უფრო კონკრეტულად, საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, ჯგუფურად კომერციული მოსყიდვის ფაქტზე საერთაშორისო კატეგორიის მსაჯები -ზაზა მაჩალაძე, ირაკლი ბერიშვილი და დავით ბერიშვილი, ასევე საკალათბურთო კლუბ "სოხუმი"-ს მწვრთნელი ვაჟა კვარაცხელია და ამავე კლუბის თანამფლობელი - თემურ დათიკაშვილი დააკავეს.
გამოძიების ინფორმაციით, რამდენიმე მატჩის ჩაწყობის შედეგად ბრალდებულებმა ჯამში 36 ათასი ლარი მიიღეს. დაკავებული 5 პირიდან 2-მა - ირაკლი და დავით ბერიშვილებმა ბრალი აღიარა და გამოძიებასთან თანამშრომლობს. მათ აღკვეთის ღონისძიების სახით გირაო, ხოლო დანარჩენ სამ ბრალდებულს პატიმრობა შეეფარდა.