საშობაო ეპისტოლეს უნდა ველოდოთ, რომელიც პატრიარქისთვის 41-ე იქნება და დარწმუნებული ვარ, საშობაო ეპისტოლე ჩვენი ერის ცხოვრებაში და მისი უწმინდესობის მოღვაწეობაში ძალიან მნიშვნელოვანი იქნება, - ამის შესახებ ჟურნალისტებს საპატრიარქოსთან ისტორიკოსმა სერგო ვარდოსანიძემ განუცხადა, რომელმაც კომენტარი გააკეთა პატრიარქის ჯანმრთელობის მდგომარეობასა და პატრიარქის საშობაო ეპისტოლეზე.

ვარდოსანიძის თქმით, უწმინდესი საპატრიარქოში გამართულ ბიბლიის ორი გამოცემის პრეზენტაციაზე თავს კარგად გრძნობდა და შეხვედრა მისი შემაჯამებელი სიტყვით დასრულდა.

„მე ექიმი არ ვარ და ამის შესახებ ვერაფერს გეტყვით. ვიზუალურად უწმინდესი შესანიშნავად იყო. ღონისძიება საათნახევარი გაგრძელდა და შემდგომ უწმინდესმა დასასრულს სიტყვა ბრძანა. პატრიარქმა დღევანდელი წარდგინება შეაჯამა“, - განაცხადა სერგო ვარდოსანიძემ.

კითხვაზე, უნდა ველოდოთ თუ არა პატრიარქის საშობაო ეპისტოლეს, ვარდოსანიძის თქმით, უნდა ველოდოთ საშობაო ეპისტოლეს, რომელიც პატრიარქისთვის 41-ე იქნება.

„დარწმუნებული ვარ, საშობაო ეპისტოლე ჩვენი ერის ცხოვრებაში და მისი უწმინდესობის მოღვაწეობაში ძალიან მნიშვნელოვანი იქნება“, - აღნიშნა ისტორიკოსმა.

მისივე თქმით, დღეს საპატრიარქოში უწმინდესის 85 წლის იუბილესთან დაკავშირებით ხელნაწერთა ეროვნული ცენტრის მიერ გამოცემული ორი ბიბლიის წარდგინება შედგა, კერძოდ, ე.წ. მცხეთური ხელნაწერის სახით გამოცემული ხუთტომეულის სრული ვარიანტი გამოიცა და ასევე ბიბლიის ორტომეული, რომელზეც აკაკი შანიძემ და ილია აბულაძემ მუშაობა ჯერ კიდევ 50-იან წლებში დაიწყეს.