აშშ-ს პრეზიდენტის დონალდ ტრამპის ადვოკატის განცხადებით, შეეცდება მაიკლ ვოლფის წიგნის დაბეჭდვას ხელი შეუშალოს. წიგნში ტრამპი არაეფექტურ პრეზიდენტად არის მოხსენიებული. ადვოკატი ასევე ტრამპის ყოფილი მრჩევლის სტივ ბენონის წინააღმდეგ სამართლებრივი ზომების გამოყენებით დაიმუქრა მის მიერ გაკეთებული კომენტარების გამო.
„ამ წიგნის ავტორისთვის არ მიმიცია უფლება რაიმე შეხება ჰქონოდა თეთრ სახლთან. წიგნთან დაკავშირებით მასთან არასდროს მისაუბრია. წიგნი სავსეა ტყუილებით, დამახინჯებული ინფორმაციითა და იმ ამბებით, რომელიც საერთოდ არ არსებობს. შეხედეთ წიგნის ავტორის წარსულს და ნახავთ რა მოუვა მას და მატყუარა სტივს!“ - დაწერა ტვიტერის საკუთარ გვერდზე დონალდ ტრამპმა.
წიგნმა სახელწოდებით „ცეცხლი და მრისხანება: ტრამპის ადმინისტრაციის შიგნით“ პოლიტიკური ვნებათაღელვა გამოიწვია, ვინაიდან მასში ტრამპი პრეზიდენტობისთვის მოუმზადებელ პიროვნებად არის მოხსენიებული და ნათქვამია, რომ პრეზიდენტობა არც სურდა.