აშშ-ის ხელისუფლებამ პაკისტანისთვის უსაფრთხოების სფეროში დახმარების გაწევის შეჩერების გადაწყვეტილება მიიღო. ამის შესახებ აშშ-ს სახელმწიფო დეპარტამენტის ოფიციალურმა წარმომადგენელმა, ჰეზერ ნაუერთმა ჟურნალისტებს განუცხადა.
„ჩვენ შეგვიძლია დავადასტუროთ, რომ გადაწყვეტილება მივიღეთ პაკისტანს ეროვნული უსაფრთხოების სფეროში დახმარების გაწევა შევუჩეროთ. ვიდრე პაკისტანის ხელისუფლება არ გადადგამს ქმედით ნაბიჯებს ტერორისტული დაჯგუფებების წინააღმდეგ, მათ შორის „თალიბანის“ წინააღმდეგ, აშშ პაკისტანისთვის დახმარების გაწევას უსაფრთხოების სფეროში შეაჩერებს“, - განაცხადა აშშ-ის სახელმწიფო დეპარტამენტის ოფიციალურმა წარმომადგენელმა.
ჰეზერ ნაუერთის თქმით, „პაკისტანისთვის აღნიშნული გადაწყვეტილება არ უნდა იყოს სიურპრიზი“.
როგორც მან აღნიშნა, აშშ-ის ხელისუფლება აფრთხილებდა პაკისტანს იმის თაობაზე, რომ ტერორიზმთან ბრძოლაში უფრო ქმედითი ნაბიჯების გადადგმაა საჭირო.
აშშ-ს სახელმწიფო დეპარტამენტში ასევე აღნიშნეს, რომ ცალკეულ შემთხვევებში ვაშინგტონი უფლებას იტოვებს პაკისტანს დახმარება გაუწიოს, როდესაც ეს აშშ-ს ეროვნული უსაფრთხოების ინტერესებში იქნება.