აშშ-ის იუსტიციის დეპარტამენტმა გააუქმა ობამას ადმინისტრაციის დროინდელი კანონი მარიხუანასთან დაკავშირებით, რომლის მიხედვით მის მოხმარებასთან დაკავშირებით არსებული ფედერალური კანონების მოქმედება რბილდებოდა იმ შტატებში, სადაც მოხმარება უკვე ლეგალიზებული იყო. აღნიშნული კანონის გაუქმებით ფედერალურ პროკურორებს ფართო გასაქანი მიეცათ მარიხუანას მოხმარებასთან დაკავშირებით აღძრან სისხლის სამართლის საქმე.
„პრეზიდენტ დონალდ ტრამპისთვის ყველაზე პრიორიტეტულია ფედერალური კანონები დაცული იყოს, იქნება ეს მარიხუანასთან თუ იმიგრაციასთან დაკავშირებული“, - განაცხადა თეთრი სახლის სპიკერმა სარა სანდერსმა.
ბოლო წლებში შტატების დონეზე მარიხუანას ლეგალიზების ფაქტებმა მოიმატა. ვაშინგტონის, ორეგონის, ალასკასა და ნევადას შტატებში კანაფის რეკრეაციული მიზნით მოხმარება ლეგალიზებულია, მასაჩუსეტსი და მეინი კი წელს აპირებენ იმავე ნაბიჯის გადადგმას.