ქუთაისის მერიაში რეორგანიზაციის შედეგად 32 ადამიანი გათავისუფლდა. როგორც მერიის ადმინისტრაციული სამსახურის უფროსის მოვალეობის შემსრულებელი გენადი კუჭუხიძე აცხადებს, კადრების შემცირება მერიაში სამსახურების გაუქმების შედეგად მოხდა.
ქალაქის მერის გადაწყვეტილებით, ადგილობრივ თვითმმართველობაში კულტურის სამსახური გაუქმდა. მის ბაზაზე ადმინისტრაციულ სამსახურში კულტურის განყოფილება ჩამოყალიბდა. გენადი კუჭუხიძის თქმით, რეორგანიზაციის საჭიროება მერიაში სამსახურების დუბლირებამ მოიტანა. ამ დროისთვის ქალაქის მერიაში დასაქმებულია 278 ადამიანი.