ბერი გაბრიელ სალოსის გამზირზე მდებარე იმ კორპუსის მცხოვრებლები, სადაც რამდენიმე კვირის წინ სპეცოპერაცია ჩატარდა, თბილისის მერიის და ისნის რაიონის გამგეობისგან არა ცალკეული ბინების, არამედ, მთლიანი კორპუსის გამაგრებას ითხოვენ.

როგორც ადგილობრივი მცხოვრებლები აცხადებენ, კორპუსი სპეცოპერაციამდეც ავარიულ მდგომარეობაში იყო. სპეცოპერაციის შემდეგ კი, საცხოვრებელი ბინები სხვა სადარბაზოებშიც დაზიანდა.

ადგილობრივების თქმით, კორპუსის გარე ფასადს ნაწილები სცვივა და რამდენიმე დღის წინ კიდევ ერთი მანქანა დაზიანდა.

„არ არის საკმარისი, რომ მარტო ის ბინები რემონტდება, სადაც უშუალოდ სპეცოპერაცია ჩატარდა. მთლიანი კორპუსია ავარიული. მანამდეც ავარიული იყო და კიდევ უფრო საშიში გახდა აქ ცხოვრება სპეცოპერაციის შემდეგ. 2 დღის წინ ფასადის ნაწილი ჩამოვარდა და მანქანას დაეცა“, - ამბობენ ადგილობრივები.

ისნის რაიონის გამგებლის, კახა ლაბუჩიძის თქმით, ყველა იმ ადამიანთან მოხდება შეხვედრა, რომლებსაც პრეტენზია აქვს. როგორც ლაბუჩიძე აცხადებს, კორპუსის გამაგრებითი სამუშაოების დასრულების შემდეგ, მოსახლეობისთვის იქ ცხოვრება უსაფრთხო იქნება.

თბილისის ვიცე მერი ირაკლი ხმალაძე, მერის მოადგილე ირაკლი ბენდელიანი და ისნის რაიონის გამგებელი კახა ლაბუჩიძე ანტიტერორისტული სპეცოპერაციისას კორპუსის დაზიანებული მონაკვეთის გამაგრებითი სამუშაოების პირველი ეტაპის მიმდინარეობას გაეცნენ.

ბერი გაბრიელ სალოსის გამზირის მე-6 შესახვევში მდებარე მე-9 კორპუსი, სადაც 72 ოჯახი ცხოვრობს, თბილისის მუნიცპალური ლაბორატორიის დასკვნით, ავარიულობის მიხედვით დაზიანების მესამე ხარისხს განეკუთვნება. სარეაბილიტაციო სამუშაოებს თბილისის მერიის კონტრაქტორი კომპანია შპს „არქიტრავი“ ახორციელებს.