საქართველოს ყოფილ პრეზიდენტ მიხეილ სააკაშვილს საკმარისი სამართლებრივი სტატუსი აქვს, რაც საშუალებას არ იძლევა მისი ექსტრადირება მოხდეს. ამის შესახებ მიხეილ სააკაშვილის ადვოკატმა რუსლან ჩერნოლუცკიმ განაცხადა.

„ჩვენ მივიჩნევთ, რომ ყველა საქმე, რომელსაც სააკაშვილის წინააღმდეგ საქართველოში სასამართლოები განიხილავენ, პოლიტიკური ხასიათისაა. ეს პოლიტიკური დევნაა. უკრაინის ხელისუფლების მხრიდან ექსტრადირებასთან დაკავშირებული ნებისმიერი ქმედება არაკანონიერი იქნება დღეს თბილისში გამოტანილი განაჩენის საფუძველზეც კი“, - განაცხადა ადვოკატმა.

გარდა ამისა, რუსლან ჩერნოლუცკიმ აღნიშნა, რომ „ადამიანი, რომელიც უკრაინის მოქალაქე იყო და ბოლო წლებში უკრაინაში ცხოვრობს, არ შეიძლება ექსტრადირებული იყოს“.

„ამის შესახებ ნათქვამია უცხოელებისა და მოქალაქეობის არმქონე პირების სტატუსის შესახებ კანონში, საერთაშორისო კონვენციებში“, - დასძინა მან.

თბილისის საქალაქო სასამართლოს მოსამართლე გიორგი არევაძემ სანდრო გირგვლიანის საქმეზე, ყოფილი პრეზიდენტის ბრალდების ნაწილთან დაკავშირებით გადაწყვეტილება დღეს გამოაცხადა. მოსამართლემ სააკაშვილი დამნაშავედ ცნო და 3 წლით თავისუფლების აღკვეთა მიუსაჯა.