2017 წელს ევროპაში ჩასული მიგრანტებისა და ლტოლვილების რაოდენობა 171 000-ს აჭარბებს, ხოლო 3 000 გზაში დაიღუპა. აღნიშნულის შესახებ ინფორმაციას მიგრაციის საერთაშორისო ორგანიზაცია აქვეყნებს.
„2017 წელს ევროპაში ზღვით 171 635 მიგრანტი და ლტოლვილი შემოვიდა“, - აღნიშნა ჟენევაში გამართულ ბრიფინგზე ორგანიზაციის წარმომადგენელმა ჯოელ მილმანმა და განმარტა, რომ საუბარია წინასწარ მონაცემებზე.
მისივე თქმით, აღნიშნულიდან 119 ათასი მიიღო იტალიამ, 29 ათასზე მეტი საბერძნეთმა, 21 ათასზე მეტი ესპანეთმა და 1000-ზე მეტი კვიპროსმა. 2016 წელს მათი საერთო რაოდენობა 363 ათასს აჭარბებდა.
ხმელთაშუა ზღვაში 2017 წლის 1-ელი იანვრიდან 20 დეკემბრამდე 3116 ადამიანი დაიღუპა. 2017 წელს ყველაზე რთულად აფრიკიდან იტალიამდე მარშრუტი დარჩა.