ამოღებულია გარკვეული ნივთმტკიცებები, თუმცა, იმდენი დარჩა, რომ მსროლელისა და მსხვერპლის პოზაზე მოგვცეს გარკვეული წარმოდგენა, - ამის შესახებ დამოუკიდებელმა ექსპერტმა მაია ნიკოლეიშვილმა „პალიტრანიუსის“ გადაცემაში „360 გრადუსი“ მაჩალიკაშვილის დაჭრის შემთხვევის ადგილის დათვალიერების საკითხზე საუბრისას განაცხადა.

ნიკოლეიშვილის თქმით, დასკვნის დადება ჯერ ნაადრევია, თუმცა, მისი გასაჯაროების უფლება მხოლოდ ოჯახთან შეთანხმების შემთხვევაში ექნება.

„შემთხვევის ადგილი დავათვალიერე, ვიცოდი, რომ კრიმინალისტები მუშაობდნენ საკმაოდ მოწესრიგებულად და ნამდვილად გამართლდა ეს საკითხი. ამოღებულია გარკვეული ნივთმტკიცებები, თუმცა იმდენი დარჩა, რომ მსროლელისა და მსხვერპლის პოზაზე მოგვცეს გარკვეული წარმოდგენა. სამედიცინო დოკუმენტაციასთან ერთად შეფასდება ყველა დეტალი, რის შემდეგაც მოვახსენებ ოჯახს. შემდეგ მათი გადასაწყვეტი იქნება, გასაჯაროვდეს დეტალები თუ არა“, - განაცხადა მაია ნიკოლეიშვილმა.

კითხვაზე, რჩება თუ არა შთაბეჭდილება, რომ მაჩალიკაშვილს შესაძლოა ეჭირა ხელყუმბარა, მაია ნიკოლეიშვილმა განაცხადა, რომ ამ კითხვაზე პასუხი მის კომპეტენციას სცილდება.