მეუღლის მიერ დაჭრილი ქალი მართვით სუნთქვაზე იმყოფება

მეუღლის მიერ დაჭრილი ქალის მდგომარეობა სტაბილურად მძიმეა და ის მართვით სუნთქვაზეა. როგორც „ინტერპრესნიუსს“ ზუგდიდისრეფერალური ჰოსპიტლის კრიტიკული მედიცინის განყოფილების გამგემ, მაკა მალანიამ განუცხადა, ჩხოროწყუს რაიონიდან ორი პაციენტი შეიყვანეს, რომლებსაც თავის არეში ნაჩეხი ჭრილობები აღენიშნებოდათ.

"მამკაცს ჩაუტარდა ოპერაცია, თუმცა მისი გადარჩენა ვერ მოხერხდა. რაც შეეხება ქალს, ის მკურნალობას განაგრძობს და მისი მდგომარეობა სტაბილურად მძიმეა",- აღნიშნა მაკა მალანიამ.

ჩხოროწყუს მუნიციპალიტეტის სოფელ ხაბუმეში მამამ შვილი ნაჯახით მოკლა, შემდეგ კი ცოლი დაჭრა. როგორც "ინტერპრესნიუსს" ჩხოროწყუს მერმა დავით გოგუამ განუცხადა, დამნაშავეს ფსიქიკური აშლილობა აქვს. "გარდაცვლილი მამაკაცი 36 წლისაა. რაც შეეხება ცოლს, ის თავის არეშია დაჭრილი და მისი მდგომარეობა მძიმეა. დაჭრილი ზუგდიდის რეფერალურ ჰოსპიტალშია გადაყვანილი", - განაცხადა გოგუამ.

როგორც „ინტერპრესნიუსს“ შსს-ს პრესსამსახურში განუცხადეს, გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს. მომხდარზე ერთი პირია დაკავებული.