ოთარ აბესაძის ადვოკატის შუამდგომლობა, დღევანდელი პროცესის გადადების თაობაზე არ დაკმაყოფილდა. ადვოკატმა ნონა ფილაურმა სასამართლოს მიმართ იშუამდგომლა, რომ აბესაძისთვის დამატებითი ექსპერტიზის ჩატარების გამო პროცესი გადადებულიყო, თუმცა სასამართლომ ეს შუამდგომლობა არ დააკმაყოფილა. ამასთან, დაცვის მხარის შუამდგომლობას არ დაეთანხმა საქმის პროკურორი ირაკლი მარშანია, რომელმაც აღნიშნა, რომ პროცესის გადადება მიზანშეწონილი არაა, ვინაიდან სასამართლო განხილვები ჭიანურდება.

თავის მხრივ, აბესაძის ადვოკატმა აღნიშნა, რომ დაცვის მხარისთვის გასაკვირია, რატომ მოხდა დღეს ბრალდებულის ბადრაგირება სასამართლოში და არა იქ, სადაც შესაბამისი ექსპერტიზაა დანიშნული.

"მოგეხსენებათ, რომ ოთარ აბესაძის ჯანმრთელობის მდგომარეობის შესწავლის მიზნით დამატებითი ექსპერტიზებია ჩასატარებელი. ეს ექსპერტიზები დანიშნულია, გაფორმებულია შესაბამისი ხელშეკრულებები და ველოდით, რომ უკვე დღესვე უნდა მომხდარიყო ბადრაგირება ექსპერტიზაზე, თუმცა ჩვენთვის უცნობია, რატომ მოხდა მისი ბადრაგირება სასამართლოში და არა ექსპერტიზაზე. არ ვიცით რასთან გვაქვს საქმე", - განაცხადა ნონა ფილაურმა.