ქრთამის აღების ბრალდებით დაკავებული მერიის ყოფილი თანამშრომლის ოთარ აბესაძის სასამართლო პროცესზე ბრალდების მხარის ორი მოწმე დაიკითხა. მოწმეები მერიის არქიტექტურის სამსახურის თანამშრომლები იყვნენ, რომლებსაც მშენებლობის ნებართვების გაცემისთვის საჭირო დოკუმენტაციის შესწავლა ევალებოდათ. მოწმეებმა დეტალურად ისაუბრეს იმ განცხადების შესწავლაზე, რომელიც იმ პირებს ეკუთვნოდა, ვისგანაც სუს-ის მტკიცებით ოთარ აბესაძემ ქრთამი აიღო.
ამასთან, ადვოკატის კითხვაზე, ითხოვდა თუ არა ოთარ აბესაძე, რომ განმცხადებელს ნებისმიერ შემთხვევაში მიეღო ნებართვა, მოწმეებმა აღნიშნეს, რომ ასეთ ფაქტს ადგილი არ ჰქონია და ისინი ოთარ აბესაძეს საერთოდ არ იცნობდნენ.
მომდევნო სასამართლო პროცესი 15 იანვარს, 13:00 საათზე, ბრალდების მხარის მტკიცებულებების გამოკვლევით გაგრძელდება.
მერიის ყოფილი თანამშრომელი ოთარ აბესაძე ქრთამის აღების ბრალდებით სუს-მა დააკავა. გამოძიების თანახმად, აბესაძემ მდინარე მტკვარზე, გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა.