ახმეტის მაჟორიტარი დეპუტატი გელა სამხარაული პანკისის ხეობის ადგილობრივი ხელისუფლების წარმომადგენლებს შეხვდა

ახმეტის მაჟორიტარი დეპუტატი გელა სამხარაული, ახმეტის მერთან და საკრებულოს თავმჯდომარესთან ერთად, პანკისის ხეობის ადგილობრივი ხელისუფლების წარმომადგენლებს შეხვდა.

როგორც „ინტერპრესნიუსს“ საქართველოს პარლამენტიდან აცნობეს, სამუშაო შეხვედრაზე, რომელზეც პანკისში დაგემილი პროექტების მიმდინარეობასა და ადგილობრივი ბიუჯეტის პრიორიტეტებს განიხილავიდნენ, საუბარი ხეობაში ჩატარებულ ანტიტერორისტულ სპეცოპერაციას შეეხო.

„ეს იყო კონკრეტული დანაშაულის პრევენცია, რომლის გაიგივება ქისტ ხალხთან დაუშვებელია. ერთმანეთისგან მკვეთრად უნდა გაიმიჯნოს ეროვნება და ტერორიზმი, რომელიც ნებისმიერ შემთხვევაში მკაცრად დასჯადია. ამ ეტაპზე, აუცილებელია შევინარჩუნოთ სიმშვიდე და დაველოდოთ გამოძიების შედეგებს. საქმის დაჩქარებული გამოძიება სახელმწიფოსა და თავად ამ საქმეში ჩართული ყველა უწყების ინტერესებში შედის“, - განაცხადა გელა სამხარაულმა.

მისივე თქმით, ხელისუფლებამ და მოსახლეობამ ერთად, ურთიერთთანამშრომლობით ხეობაში უნდა შექმნან ცხოვრების ისეთი პირობები, რომ აქტიურ საზოგადოებრივ ცხოვრებაში, რაც შეიძლება მეტი ახალგაზრდა ჩაერთოს და რეალიზდეს. აღინიშნა, რომ გაგრძელდება ხეობაში მიმდინარე ინფრასტრუქტურული პროექტები, მოგვარდება გზების მოწერიგებასთან და წყლით უზრუნველყოფასთან დაკავშირებული საკითხები. მომდევნო შეხვედრა პანკისის ხეობაში მცხოვრებ ახალგაზრდა თაობის წარმომადგენლებთან გაიმართება.