ისტორიკოსისა და აკადემიკოსის, მარიკა ლორთქიფანიძის გარდაცვალების გამო აჭარის უმაღლესი საბჭოს თავმჯდომარე, დავით გაბიძე მწუხარებას გამოთქვამს. გავრცელებულ სამძიმრის წერილში აღნიშნულია,რომ მარიკა ლორთქიფანიძემ დამსახურებულად დაიკავა მეცნიერისა და ქვეყნის მემატიანის სახელი.
„ღრმა მწუხარებას გამოვთქვამ ცნობილი ისტორიკოსის, მეცნიერებათა ეროვნული აკადემიის ნამდვილი წევრის, აკადემიკოსისა და თბილისის საპატიო მოქალაქის მარიკა ლორთქიფანიძის გარდაცვალების გამო. ქალბატონი მარიკა 1922 წლის 28 აგვისტოს ქალაქ ბათუმში დაიბადა. მან ძალზე საინტერესო ცხოვრების გზა განვლო და მთელი თავისი სიცოცხლე საქართველოს ისტორიის კვლევას შეალია. მეცნიერი წლების განმავლობაში მოღვაწეობდა თბილისის სახელმწიფო უნივერსიტეტში. მარიკა ლორთქიფანიძემ საქართველოს წლების განმავლობაში მეცნიერთა არაერთი თაობა აღუზარდა და სრულიად დამსახურებულად დაიმკვიდრა გამორჩეული მეცნიერის, ქვეყნის მემატიანის სახელი. აჭარის უმაღლესი საბჭოს სახელით ვუსამძიმრებ მართლაც დიდი მეცნიერის ოჯახსა და ქართულ სამეცნიერო საზოგადოებას, სრულიად საქართველოს. წარუშლელია მარიკა ლორთქიფანიძის კვალი ჩვენი ქვეყნის ისტორიაში, რომელსაც დიდი რუდუნებითა და გულწრფელობით ემსახურა“, - აღნიშნულია სამძიმრის წერილში.